dhyānam
māṇikyavīṇāmupalālayantīm
madālasāṃ mañjuḷavāgvilāsām|
māhēndranīladyutikōmalāṅgīm
mātaṅgakanyāṃ manasā
smarāmi||1||
caturbhujē candrakalāvataṃsē kucōnnatē
kuṅkumarāgaśōṇē|
puṇḍrēkṣupāśāṅkuśapuṣpabāṇahastē
namastē jagadēkamātaḥ||2||
viniyōgaḥ
mātā marakataśyāmā mātaṅgī madaśālinī|
kuryāt kaṭākṣaṃ kalyāṇī
kadambavanavāsinī||
stutiḥ
jaya mātaṅgatanayē jaya nīlōtpaladyutē|
jaya saṅgītarasikē jaya
līlāśukapriyē||
daṇḍakam
jaya janani sudhāsamudrān-tarudyan-
maṇidvīpa-saṃrūḍha-bilvāṭavī-madhya-
kalpa-drumākalpa-kādamba-kāntāra-
vāsapriyē kṛttivāsapriyē
sarvalōkapriyē
sādarārabdha-saṅgīta-sambhāvanā-
sambhramālōla-nīpasragābaddha-
cūḷīsanāthatrikē
sānumatputrikē
śēkharībhūta-śītāṃśurēkhā-mayūkhāvalī-
baddha-susnigdha-nīlālakaśrēṇi-śṛṅgāritē lōkasambhāvitē
kāmalīlā-dhanuḥ sannibha-bhrūlatā-puṣpa-
sandōha-sandēha-kṛllōcanē
vāksudhāsēcanē
cārugōrōcanāpaṅka-kēḷīlalā-
mābhirāmē surāmē ramē
prōllasaddh-vāḷikā-mauktikaśrēṇikā-
candrikā-maṇḍalōdbhāsi-
gaṇḍasthalanyasta-kastūrikā-patrarēkhā-
samudbhūta-saurabhya-sambhrānta-
bhṛṅgāṅganāgīta-sāndrībhavan-
mandratantrīsvarē susvarē
bhāsvarē
vallakī-vādana-prakriyā-lōla-
tāḷīdaḷābaddha-tāṭaṅka-
bhūṣāviśēṣānvitē
siddha-sammānitē
divyahālāma-dōdvēlahēlāla-
saccakṣurāndōḷana-śrīsamākṣipta-karṇaika-
nīlōtpalē śyāmaḷē pūritāśēṣa-
lōkābhi-vāñchāphalē
śrīphalē
svēda-bindūllasad-bhāla-lāvaṇya-
niṣyanda-sandōha-sandēha-kṛnnāsikā-
mauktikē sarvamantrātmikē
kāḷikē
mugddha-mandasmitō-dāravaktrasphurat-
pūga-karpūra-tāmbūla-khaṇḍōtkarē
jñānamudrākarē sarvasampatkarē
padmabhāsvatkarē śrīkarē
kunda-puṣpadyutisnigdha-dantāvalī-
nirmalālōla-kallōla-sammēḷa-
nasmēraśōṇādharē
cāruvīṇādharē pakvabimbādharē
sulalita-navayauvanārambha-
candrōdayōdvēla-lāvaṇya-
dugdhārṇavāvirbhavatkambu-bimbōka-
bhṛtkantharē
satkalā-mandirē mantharē
divya-ratnaprabhā-bandhuracchanna-hārādi-
bhūṣā-samudyōtamānā-
navadyāṅgaśōbhē śubhē
ratna-kēyūra-raśmicchaṭā-pallava-
prōllasad-dōllatā-rājitē
yōgibhiḥ pūjitē
viśva-diṅmaṇḍalavyāpta-māṇikya-
tējaḥ sphurat-kaṅkaṇālaṅkṛtē
vibhramālaṅkṛtē sādhubhiḥ
satkṛtē
vāsarārambha-vēḷā-samujjṛmbha-
māṇāravinda-pratidvandvi-pāṇidvayē
santatōdyadvayē advayē
divya-ratnōrmikā-dīdhiti-stōma-
sandhyāyamā-nāṅguḷī-pallavōdyanna-
khēndu-prabhā-maṇḍalē sannutākhaṇḍalē
citprabhāmaṇḍalē
prōllasatkuṇḍalē
tārakārāji-nīkāśa-hārāvalismēra-
cārustanā-bhōgabhārānamanmadhya-
vallīvalicchēda-vīcī-samudyat-
samullāsa-sandarśitākāra-saundarya-
ratnākarē vallakī-bhṛtkarē
kiṅkara-śrīkarē
hēma-kumbhōpa-mōttuṅga-vakṣōjabhārāvanamrē trilōkāvanamrē
lasadvṛtta-gambhīra-nābhī-sarastīra-
śaivāla-śaṅkākara-śyāmarōmāvalī-
bhūṣaṇē mañjusambhāṣaṇē
cāruśiñcatkaṭīsūtra-nirbhatsitānaṅga-
līlā-dhanuśśiñcinī-ḍambarē
divyaratnāmbarē
padmarāgōllasan-mēkhalā-bhāsvara-śrōṇi-
śōbhājita-svarṇa-bhūbhṛttalē candrikā-śītalē
vikasita-navakiṃśukātāmra-divyāṃśu-
kaccanna-cārūru-śōbhā-parābhūta-
sindūra-śōṇāya-mānēndra-mātaṅga-
hasmārggaḷē
vaibhavānarggaḷē śyāmaḷē
kōmaḷasnigddha-nīlōtpalōt-
pāditānaṅga-tūṇīra-śaṅkākarōdāma-
jaṅghālatē cārulīlāgatē
namra-dikpāla-sīmantini
kuntaḷasnigddha-nīlaprabhā-puñcasañjāta-
durvāṅku-rāśaṅka-sāraṅga-saṃyōga-
riṅkhanna-khēndūjjvalē
prōjjvalē nirmalē
brahmadēvēśa-lakṣmīśa-bhūtēśa-tōyēśa-
vāgīśa-kīnāśa-daityēśa-yakṣēśa-
vāyvagni-māṇikya-saṃhṛṣṭa-kōṭīra-
bālā-tapōddāmalākṣā-rasāruṇya-
tāruṇya-lakṣmī-gṛhītāṅghri-padmē
supadmē umē
sūrucira-navaratna-pīṭhasthitē susthitē
ratnapadmāsanē ratnasiṃhāsanē
śaṅkhapadmadvayōpāśritē viśritē
tatra vighnēśa-durgāvaṭu-kṣētrapālairyutē
mattamātaṅga-kanyā-samūhānvitē
mañjuḷāmēnakādyaṅganāmānitē
bhairavairaṣṭabhirvēṣṭitē dēvi
vāmādibhiḥ śaktibhiḥ sēvitē
dhātri-lakṣmyādi-śaktyaṣṭakaiḥ saṃyutē
mātṛkāmaṇḍalairmaṇḍitē
yakṣa-gandharva-siddhāṅganā-maṇḍalairarcitē
pañcabāṇātmikē pañcabāṇēna ratyā ca sambhāvitē
prītibhājā vasantēna
cānanditē
bhaktibhājāṃ paraṃ śrēyasē kalpasē
yōgināṃ mānasē dyōtasē
chandasāmōjasā bhrājasē
gīta-vidyā-vinōdādi tṛṣṇēna kṛṣṇēna sampūjyasē
bhaktimaccētasā vēdhasā stūyasē
viśvahṛdyēna vādyēna
vidyādharairgīyasē
śravaṇaharadakṣiṇakvāṇayā vīṇayā
kinnarairgīyasē
yakṣagandharva-siddhāṅganā-maṇḍalairarcyasē
sarvasaubhāgya-vāñchāvatībhirvadhūbhiḥ
surāṇāṃ samārādhyasē
sarvavidyāviśēṣātmakaṃ
cāṭugāthā-samuccāraṇā-kaṇṭha-mūlōla-
sadvarṇarājitrayaṃ kōmaḷaśyāmaḷō-
dārapakṣadvayaṃ tuṇḍaśōbhāti-dhūrībhavat
kiṃśukābhaṃ taṃ śukaṃ
lālayantī parikrīḍasē
pāṇipadmadvayēnā-kṣamālāmapi sphāṭikīṃ
jñānasārātmakaṃ pustakaṃ cāparēṇāṅkuśaṃ
pāśamābibhrati yēna sañcintyasē cētasā
tasya vaktrāntarāt gadyapadyātmikā
bhāratī niḥsarēt
yēna vā yāvakā bhākṛtirbhāvyasē
tasya vaśyā bhavanti striyaḥ pūruṣāḥ
yēna vā śātakumbhadyutirbhāvyasē
sō'pi lakṣmīsahasraiḥ
parikrīḍatē
kinna siddhyēdvapuḥ śyāmaḷaṃ kōmaḷaṃ
candra-cūḍānvitaṃ tāvakaṃ dhyāyataḥ
tasya līlā sarōvāridhiḥ
tasya kēḷīvanaṃ nandanaṃ
tasya bhadrāsanaṃ bhūtalaṃ
tasya gīrdēvatā kiṅkarī
tasya ca''jñākarī śrī svayam
sarvatīrthātmikē sarvamantrātmikē
sarvatantrātmikē sarvayantrātmikē
sarvapīṭhātmikē sarvasattvātmikē
sarvaśaktyātmikē
sarvavidyātmikē sarvayōgātmikē sarvarāgātmikē
sarvaśabdātmikē sarvavarṇātmikē sarvaviśvātmikē
sarvagē
hē jaganmātṛkē pāhi māṃ pāhi māṃ pāhi mām
dēvi tubhyaṃ namō dēvi
tubhyaṃ namō dēvi tubhyaṃ namaḥ|
||iti mahākavi kālidāsaviracitaṃ śyāmaḷā daṇḍakaṃ sampūrṇam||
No comments:
Post a Comment