Kanakadhara Stotram

aN^gaM hareH puLakabhUShaNamAshrayantI
bh.rN^gAN^ganeva mukulAbharaNaM tamAlam |
aN^gIk.rtAkhilavibhUtirapAN^galIlA
mAN^galyadAstu mama maN^gaLadevatAyAH || 1||

mugdhA muhurvidadhatI vadane murAreH
prematrapApraNihitAni gatAgatAni |
mAlA d.rshormadhukarIva mahotpale yA
sA me shriyaM dishatu sAgarasaMbhavAyAH || 2||

AmIlitAkShamadhigamya mudA mukundaM
AnandakandamanimeShamanaN^gatantram |
AkekarasthitakanInikapakShmanetraM
bhUtyai bhavenmama bhujaN^gashayAN^ganAyAH || 3||

bAhvantare madhujitaH shritakaustubhe yA
hArAvalIva harinIlamayI vibhAti |
kAmapradA bhagavato'pi kaTAkShamAlA
kalyANamAvahatu me kamalAlayAyAH || 4||

kAlAmbudALilalitorasi kaiTabhAreH
dhArAdhare sphurati yA taTidaN^ganeva |
mAtussamastajagatAM mahanIyamUrtiH
bhadrANi me dishatu bhArgavanandanAyAH || 5||

prAptaM padaM prathamataH khalu yatprabhAvAt
mAN^galyabhAji madhumAthini manmathena |
mayyApatettadiha mantharamIkShaNArdhaM
mandAlasaM ca makarAlayakanyakAyAH || 6||

vishvAmarendrapadavibhramadAnadakShaM
AnandaheturadhikaM muravidviSho'pi |
IShanniShIdatu mayi kShaNamIkShaNArddhaM
indIvarodarasahodaramindirAyAH || 7||

iShTA vishiShTamatayo'pi yayA dayArdra
d.rShTyA triviShTapapadaM sulabhaM labhante |
d.rShTiH prah.rShTakamalodaradIptiriShTAM
puShTiM k.rShIShTa mama puShkaraviShTarAyAH || 8||

dadyAddayAnupavano draviNAmbudhArAM
asminnaki~ncanavihaN^gashishau viShaNNe |
duShkarmagharmamapanIya cirAya dUraM
nArAyaNapraNayinInayanAmbuvAhaH || 9||

gIrdevateti garuDadhvajasundarIti
shAkambarIti shashishekharavallabheti |
s.rShTisthitipraLayakeliShu saMsthitA yA
tasyai namastribhuvanaikagurostaruNyai || 10||

shrutyai namo'stu shubhakarmaphalaprasUtyai
ratyai namo'stu ramaNIyaguNArNavAyai |
shaktyai namo'stu shatapatraniketanAyai
puShTyai namo'stu puruShottamavallabhAyai || 11||

namo'stu nAlIkanibhAnanAyai
namo'stu dugdhodadhijanmabhUmyai |
namo'stu somAm.rtasodarAyai
namo'stu nArAyaNavallabhAyai || 12||

namo'stu hemAmbujapIThikAyai
namo'stu bhUmaNDalanAyikAyai |
namo'stu devAdidayAparAyai
namo'stu shArN^gAyudhavallabhAyai || 13||

namo'stu devyai bh.rgunandanAyai
namo'stu viShNorurasi sthitAyai |
namo'stu lakShmyai kamalAlayAyai
namo'stu dAmodaravallabhAyai || 14||

namo'stu kAntyai kamalekShaNAyai
namo'stu bhUtyai bhuvanaprasUtyai |
namo'stu devAdibhirarcitAyai
namo'stu nandAtmajavallabhAyai || 15||

sampatkarANi sakalendriyanandanAni
sAmrAjyadAnavibhavAni saroruhAkShi |
tvadvandanAni duritAharaNodyatAni
mAmeva mAtaranishaM kalayantu mAnye || 16||

yatkaTAkShasamupAsanAvidhiH
sevakasya sakalArthasaMpadaH |
saMtanoti vacanAN^gamAnasaiH
tvAM murArih.rdayeshvarIM bhaje || 17||

sarasijanilaye sarojahaste
dhavaLatamAMshukagandhamAlyaShobhe |
bhagavati harivallabhe manoj~ne
tribhuvanabhUtikari prasIda mahyam || 18||

digghastibhiH kanakakuMbhamukhAvas.rShTa
svarvAhinI vimalacArujalAplutAN^gIm |
prAtarnamAmi jagatAM jananImasheSha
lokAdhinAthag.rhiNImam.rtAbdhiputrIm || 19||

kamale kamalAkShavallabhe tvaM
karuNApUrataraN^gitairapAN^gaiH |
avalokaya mAmaki~ncanAnAM
prathamaM pAtramak.rtrimaM dayAyAH || 20||

devi prasIda jagadIshvari lokamAtaH
kalyAnagAtri kamalekShaNajIvanAthe |
dAridryabhItih.rdayaM sharaNAgataM mAm
Alokaya pratidinaM sadayairapAN^gaiH || 21||

stuvanti ye stutibhiramIbhiranvahaM
trayImayIM tribhuvanamAtaraM ramAm |
guNAdhikA gurutarabhAgyabhAgino
bhavanti te bhuvi budhabhAvitAshayAH || 22||

|| iti shrImad shaN^karAcAryak.rta
shrI kanakadhArAstotraM saMpUNam ||